Borealis en La Nueva España (y van dos)

Borealis, el proyecto de Eduardo Suárez, vuelve a aparecer en el diario La Nueva España, esta vez en un artículo biográfico firmado por el periodista y crítico musical Aurelio Argel.


Enlace: http://www.lne.es/cultura/2013/11/21/borealis-otru-folk-fechu-nasturies/1503108.html

||||| ||||| ||||| ||||| ||||| ||||| ||||| |||||

"Borealis": otru folk fechu n´Asturies ye posible

"Tumba para un caballo cojo", la nueva entrega musical d'Eduardo Suárez

21.11.2013 | 03:13

Aurelio Argel El mundu de la ellaboración musical asturiana vive va cuantayá - como tóo- una situación complexa: naguando por trabayu a embute pa los estudios de grabación, sellos musicales escasos, espardidura probe del productu y de la obra del músicu, mercáu encanixáu...

Atrevese a entamar una aventura musical col enfotu de da-y remate guapín y convencer con ella en casa paez tovía peor. Ye pa espaxarar al públicu y pa palmiar el llogru curiosu de "Borealis" (burdiyu artísticu del músicu y compositor asturianu Eudardo Suárez) que vio zarráu'l camín más allegáu pero que sedució coles sos creaciones a un sellu británicu qu´apostó por elles. L'añu pasáu'l sellu londinense Reverb Worship (cola distribución de Normanrecords) editába-y el trabayu "Los ojos del sobremundo" y va escasu tiempu tamién "Tumba para un caballo cojo" que "Borealis" vien presentando dende entamos del branu por dellos escenarios asturianos. De trayectoria independiente, Eduardo "Borealis" Suárez formó parte -y de xemes en cuando tamién- de bandes asturianes como "Xplaint" (crossover estética de los noventa), "Fullnoise" (mathmetal y noisecore con dellos Ep.), "Audiotrack" (post-rock) o "ECHTRA" (ellectrónica xunto al pernomáu DJ Pimp de "Truequedart" con dos discos editaos). Son grupos de la estremada escena asturiana con delles candidatures y reconocimientos nos Premios AMAS, con nominaciones en llistes radiofóniques o en publicaciones especiales que llograron primeros puestos, fixeron anuncios de publicidá o participaron n'eventos como'l Festival de Cine de Xixón.

La música que s'oi nel discu "Tumba para un caballo cojo", como señalaben na so páxina los responsables del sellu británicu que lu editaron, esperó hasta engamar la so fechura pola perfección qu'escorría "Borealis" dende l'orixe del proyectu y que yá s'apalpayaba bien dello nel discu anterior. "Tumba para un caballo cojo" inclúi pieces instrumentales estenses grabaes en Xixón con guitarres de seis y doce cuerdes como "La güestia", "Santuario al sol", "Ascensión", "Caballo cojo", "Pagano" y "Caballo ganador" que calcañen nel drone-folk, el primitive o nel ambient-acústicu ensin escaecer dellos chisgos a la psicodelia. De les composiciones de "Borealis" la crítica y blogs europeos péritos nel xéneru que-y emprestaron atención dicen qu´encuallen guapamente cola maxa sonoro de creadores como Leo Kottke, Ben Chasny / Six Organ of Admittance, Paul Metzger o Rick Tomlinson de "Voice of Seven Woods-Seven Thunders".

"Borealis" surdió hai ocho años y llegó al cumal d´una carrera d´heriedu clásicu al traviés de les guitarres acústiques o elléctriques. Grabó entós con caxes de ritmos, guitarres, baxos, teclaos y metalófonos un primer proyectu enxamás editau que sicasí llegó a la final del "Proyecto Demo 2008" de RNE-3 y MTV énte 120 maquetes de toa Europa consiguiendo ser la propuesta más escuchada entá ensin llograr premiu. "Tumba para un caballo cojo" agranda la guapura y aposentamientu sonoros plasmaos en "Los ojos del sobremundo" y camentadores del universu guitarreru de clásicos como Nic Jones, John Renbourn, Robin Williamson, Bert Jansch o Tony McManus, por citar a dellos xigantes del folk.

El discu "Los ojos del sobremundo" llegó a sonar en cadenes radiofóniques independientes d´Estados Xuníos como la VRX d'Austin (Texas) y pasó pol veteranu Festival Iberia-Huesca ensin alcontrar malapenes ralura pola que colase na escena o los medios llariegos. "Tumba para un caballo cojo" arrancó de mou pianu y bon acoyimientu por dellos escenarios y otru sellu distintu va editar d´esmenu un formatu "digipack" colos dos trabayos d´esti otru folk fechu n'Asturies.